ენერგოომბუდსმენის ჩართულობით სოფელ კარალეთში ელექტროენერგიის მიწოდების ხარისხი გაუმჯობესდა
შიდა ქართლში სამუშაო ვიზიტის ფარგლებში საზოგადოებრივი დამცველი ადგილზე გაეცნო სოფელ კარალეთში იმ ინფრასტრუქტურულ სამუშაოებს, რომლებიც განხორციელდა ენერგოომბუდსმენის რეკომენდაციის საფუძველზე.
მომხმარებელთა ინტერესების საზოგადოებრივი დამცველის სამსახურს სოციალური ქსელის მეშვეობით მომართა სოფელ კარალეთში მცხოვრებმა- გ.ს.-მ. მისი განმარტებით, რეგიონს წლების განმავლობაში აქვს პრობლემა ელექტროენერგიის დაბალი ძაბვისა და ხშირი, წინასწარი გაფრთხილების გარეშე განხორციელებული წყვეტების გამო. აღნიშნული ხელს უშლიდა საყოფაცხოვრებო ტექნიკის მუშაობას და ქმნიდა სერიოზულ დისკომფორტს მოსახლეობისთვის.
დამცველის რეკომენდაციის საფუძველზე, სს „ენერგო-პრო ჯორჯიამ“ სოფელ კარალეთში განახორციელა ინფრასტრუქტურული სამუშაოები, მათ შორის:
- 30 საყრდენის განახლება
- 7 კმ. სადენის შეცვლა
- ქვესადგურ „კარალეთის“ სრული რემონტი
- ახალი ძალოვანი ტრანსფორმატორის მონტაჟი
განხორციელებულმა მასშტაბურმა სამუშაოებმა მნიშვნელოვნად გააუმჯობესა სოფელ კარალეთში ძაბვის სტაბილურობა და ელექტროენერგიის მიწოდების საერთო ხარისხი, რაც პირდაპირ აისახა მომხმარებელთა მომსახურების პირობების გაუმჯობესებაზე.
ენერგოომბუდსმენის სამსახური მომავალშიც გააგრძელებს რეგიონებში შეხვედრებს, რათა უზრუნველყოფილ იქნას მოქალაქეთა უფლებების დაცვა და კომუნალური მომსახურების ხარისხის გაუმჯობესება.
