ენერგოომბუდსმენი აგრძელებს რეგიონულ შეხვედრებს შიდა ქართლში
მომხმარებელთა ინტერესების საზოგადოებრივი დამცველის მოვალეობის შემსრულებელი ნინო გულეიშვილი სამუშაო ვიზიტით ქ. გორში იმყოფებოდა, სადაც შეხვედრა გამართა შიდა ქართლის სახელმწიფო რწმუნებულთან- სიმონ გულედანთან. შეხვედრას ასევე ესწრებოდნენ: რწუმუნებულის პირველი მოადგილე- მიხეილ ფავლენიშვილი, ქ. გორის მუნიციპალიტეტის მერი- კონსტანტინე ბუზალაძე, ქ. კასპის მუნიციპალიტეტის მერი- ვახტანგ მაისურაძე და ადგილობრივი თვითმმართველობის წარმომადგენლები.
შეხვედრაზე განიხილეს რეგიონში არსებული ენერგეტიკული გამოწვევები, მათ შორის — ელექტროენერგიის, ბუნებრივი გაზისა და წყალმომარაგების მიწოდებასთან დაკავშირებული პრობლემები.
ნინო გულეიშვილმა მონაწილეებს გააცნო ენერგოომბუდსმენის სამსახურის ფუნქცია-მოვალეობები და მიმდინარე საქმიანობა.
მუნიციპალიტეტების წარმომადგენლებმა დეტალურად წარმოადგინეს ინფორმაცია სოფლებში არსებულ პრობლემებზე და კომუნალური კომპანიების მხრიდან დაფიქსირებულ სისტემურ დარღვევებზე. წარდგენილი ფოტომასალა ხაზგასმით ასახავდა დაზიანებულ ინფრასტრუქტურას და მომსახურების ხარისხთან დაკავშირებულ პრობლემურ საკითხებს.
აღნიშნილი ვიზიტის შედეგად მიღებული ინფორმაციის საფუძველზე, მომხმარებელთა ინტერესების საზოგადოებრივი დამცველი დაიწყებს საკითხის სამართლებრივ შესწავლას და შესაბამის რეკომენდაციებს გაუგზავნის კომუნალურ კომპანიებს.
ენერგოომბუდსმენის სამსახური მომავალშიც გააგრძელებს რეგიონებში შეხვედრებს, რათა უზრუნველყოფილ იქნას მოქალაქეთა უფლებების დაცვა და კომუნალური მომსახურების ხარისხის გაუმჯობესება.
