ნინო გულეიშვილმა მომხმარებლის დაცვის საერთაშორისო კვირეულის ფარგლებში ზუგდიდში გამართულ შეხვედრაში მიიღო მონაწილეობა

მომხმარებელთა ინტერესების საზოგადოებრივი დამცველის მოვალეობის შემსრულებელმა (ენერგოომბუდსმენმა) , ნინო გულეიშვილმა მომხმარებლის  დაცვის III საერთაშორისო კვირეულის ფარგლებში, ქ. ზუგდიდში გამართულ შეხვედრაზე ენერგეტიკისა და წყალმომარაგების სექტორებში მომხმარებელთა სამართლებრივ უფლებებზე ისაუბრა.  

ნინო გულეიშვილმა შეხვედრის მონაწილეებს გააცნო ენერგოომბუდსმენის სამსახურის ფუნქცია-მოვალეობები, ისაუბრა სამსახურის როლსა და საქმიანობაზე, აგრეთვე წარადგინა ინფორმაცია ენერგეტიკის და წყალმომარაგების სექტორებში მომხმარებელთა უფლებრივი მდგომარეობის შესახებ, ასევე თუ როგორ დაიცვას მომხმარებელმა საკუთარი უფლებები, დარღვევის შემთხვევაში, ვის მიმართოს და რა ფორმით.

10-15 მარტს ექვსი მარეგულირებელი უწყების - საქართველოს ენერგეტიკისა და წყალმომარაგების მარეგულირებელი ეროვნული კომისიის, კონკურენციისა და მომხმარებლის დაცვის სააგენტოს, კომუნიკაციების კომისიის, ეროვნული ბანკის, დაზღვევის სახელმწიფო ზედამხედველობის სამსახურისა და სურსათის ეროვნული სააგენტოს ერთობლივი ორგანიზებით მომხმარებლის დაცვის III საერთაშორისო კვირეული იმართება. კვირეულის მიზანია მომხმარებელთა უფლებების დაცვის მექანიზმების გაუმჯობესება.